KOPIA
ພິທີ ລົງນາມ ເຊັນສັນຍາໂຄງການ ສ້າງພື້ນຖານໃນການຜະລິດເຂົ້າທັນສະໄໝ ຢູ່ ສປປ ລາວ
ໃນຕອນບ່າຍຂອງວັນທີ 2 ພຶດສະພາ 2023 ທີຫ້ອງປະຊຸມນ້ອຍ ສະຖາບັນ ໄດ້ຈັດພິທີ ລົງນາມ ເຊັນສັນຍາໂຄງການ ສ້າງພື້ນຖານໃນການຜະລິດເຂົ້າທັນສະໄໝ ຢູ່ ສປປ ລາວ ລະຫວ່າງສະຖາບັນຄົ້ນຄວ້າກະສິກໍາ, ປ່າໄມ້ ແລະ ພັດທະນາຊົນນະບົດ ແລະ ສູນຄົ້ນຄວ້າກະສິກຳສາກົນແຫ່ງ ສ. ເກົາຫຼີ (KOPIA), ໃຫ້ກຽດລົງນາມເຊັນສັນຍາໂດຍ ທ່ານ ປອ.ນາງ ໃຈ ບຸນພະນຸໄຊ ຫົວໜ້າສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ ແລະ ທ່ານ ຊິນຈາງໂຮ ອຳນວຍການສູນໂກເປຍ(KOPIA), ສ.ເກົາຫຼີ ປະຈຳ ສປປລາວ, ມີຮອງຫົວໜ້າສະຖາບັນ, ຫົວໜ້າສູນ, ນັກຄົ້ນຄວ້າ ພ້ອມດ້ວຍແຂກຖືກເຊີນເຂົ້າຮ່ວມເປັນສັກຂີພິຍານໃນຄັ້ງນີ້.
ໂຄງການ ສ້າງພື້ນຖານໃນການຜະລິດເຂົ້າທັນສະໄໝ ເປັນໂຄງການທີ່ໄດ້ຮັບທຶນຊ່ວຍເຫຼືອລ້າ ຈາກ ລັດຖະບານ ສ. ເກົາຫຼີ ຜ່ານທາງສູນ ໂກເປຍ ປະຈໍາ ສປປ ລາວ ໂດຍກະຊວງກະສິກໍາ ແລະ ປ່າໄມ້ ໄດ້ມອບໃຫ້ ສະຖາບັນຄົ້ນຄວ້າກະສິກໍາ, ປ່າໄມ້ ແລະ ພັດທະນາຊົນນະບົດ ເປັນຜູ້ຮ່ວມຮັບຜິດຊອບໃນການຈັດຕັ້ງປະຕິບັດ ໂຄງການ ຮ່ວມກັບ ສູນ KOPIA ປະຈໍາ ສປປ ລາວ.
ໂຄງການນີ້ມີເປົ້າໝາຍໃນການຈັດຕັ້ງປະຕິບັດຢູ່ໃນ 3 ບ້ານ ຂອງເມືອງປາກງຶ່ມຄື: ບ້ານນາຊາ, ບ້ານໝາກນາວເໜືອ ແລະ ບ້ານ ໝາກຮຽວ ນະຄອນຫຼວງວຽງຈັນ ແລະ ມີໄລຍະໃນການຈັດຕັ້ງປະຕິດບັດເປັນເວລາ 5 ປີ 2023-2027. ເປົ້າໝາຍແມ່ນຈະປັບປຸງພື້ນທີ່ການຜະລິດເຂົ້າ ໃນເນື້ອທີ່ທັງໝົດ 970 ເຮັກຕາ ພາຍໃນ 3 ບ້ານເປົ້າໝາຍ ຕາມກໍານົດເວລາຂອງໂຄງການ, ເຊິງປີໜຶ່ງ ຈະປັບປຸງພື້ນທີ່ນາຈໍານວນ 194 ເຮັກຕາ, ໂດຍການ ເລີ່ມປັບນາຈາກໃຮ່ນ້ອຍ ເປັນໃຮ່ໃຫຍ່ ໃຫ້ໄດ້ຂະໜາດ 2,000 ຫາ 5,000 ຕາແມັດ/ໃຮ່ ເພື່ອຮອງຮັບການນໍາໃຊ້ກົນຈັກເຂົ້າໃນການຜະລິດເຂົ້າ ເປັນຕົ້ນລົດໄຖນາໃຫຍ່, ລົດດໍານາ ແລະ ລົດກ່ຽວເຂົ້າ.
ໂຄງການຈະຕອບສະໜອງຝຸນຄອກ ເພື່ອປັບປຸງຄວາມອູດົມສົມບູນຂອງດິນໃນພື້ນທີ່ ນາທີ່ຖືກປັບໃໝ່ ຈໍານວນ 310 ໂຕນ/ປີ ແລະ ແນວພັນເຂົ້າລຸ້ນ2 ໃຫ້ແກ່ກຸມຜະລິດແນວພັນເຂົ້າ ເພື່ອນໍາໃຊ້ເປັນແມ່ພັນໃນການຜະລິດເມັດພັນລຸ້ນ3 ເພື່ອຂາຍຄືນໃຫ້ໂຄງການ ສໍາລັບກະກຽມຕອບສະໜອງ ໃຫ້ແກ່ ກຸ່ມຜະລິດເປັນສິນຄ້າ ໃນປີ 2024 ເປັນຕົ້ນໄປ. ຕອບສະໜອງແນວພັນເຂົ້າລຸ້ນ 3 ໃຫ້ກຸ່ມຜະລິດເປັນສິນຄ້າ ປີລະ 11,64 ໂຕນ/ປີ ແລະ ຝຸ່ນວິທະຍາສາດ ຈໍານວນ 29 ໂຕນ/ປີ.
ຈະມີການຕິດຕັ້ງ ເຕົາອົບເຂົ້າຂະໜາດ 80-100 ໂຕນ/24 ຊົວໂມງ, ໂຄງຄັດເມັດພັນ ຂະໜາດການຄັດເມັດພັນ 8-10 ໂຕນ/24 ຊມ, ໂຮງສີເຂົ້າ ຂະໜາດກໍາລັງການສີ 8-10 ໂຕນ/24 ຊມ, ສາງເກັບເຂົ້າ ຂະໜາດ ບັນຈຸ 2,000 ໂຕນ.
ເປົ້າໝາຍຂອງໂຄງການໃນປີ 2023 ແມ່ນຈະປັບປຸງຜົນຜະລິດເຂົ້າໃຫ້ໄດ້ ໂດຍສະເລ່ຍຈໍານວນ 3,2 ໂຕນ/ເຮັກຕາ ເຊິ່ງຄາດວ່າຈະໄດ້ຜົນຜະລິດເຂົ້າທັງໝົດຈໍານວນ 3,300 ໂຕນ ແລະ ຄິດໄລໃສຫົວຄົນຈະໄດ້ 1,280 ກລ/ຄົນ/ປີ. ໃນປີ 2027 ໂຄງການມີເປົ້າໝາຍປັບນາເປັນໃຮ່ໃຫຍ່ທັງໝົດໃນ 3 ບ້ານ ຈໍານວນ 723 ເຮັກຕາ, ມີເປົ້າໝາຍເພີ່ມຜົນຜະລິດເປັນ 4.5 ໂຕນ/ເຮັກຕາ ເຊິ່ງຄາດວ່າຈະໄດ້ຜົນຜະລິດເຂົ້າທັງໝົດຈໍານວນ 4,640 ໂຕນ ແລະ ຄິດໄລ່ໃສຫົວຄົນຈະໄດ້ 1,810 ກລ/ຄົນ/ປີ.
ໂຄງການໄດ້ເລີມຈັດຕັ້ງປະຕິບັດໃນເດືອນ3 ປີ 2023 ໂດຍໄດ້ຝຶກອົບຮົມ ເຕັກນິກການຜະລິດເມັດພັນເຂົ້າຢຸ່ ສູນຄົ້ນຄວ້າເຂົ້າ ແລະ ພືດເສດຖະກິດ ໃຫ້ ຊາວນາ ທີ່ເປັນສະມາຊິກ ກຸ່ມຜະລິດເມັດພັນ ຈໍານວນ 21 ຄົນ ຈາກ 3 ບ້ານເປົ້າໝາຍ.
ໃນເດືອນ 4 ປີ 2023 ໄດ້ສໍາເລັດການປັບໃຮ່ນາຢູ່ ບ້ານນາຊາ ໃນເນື້ອທີ່ຈໍານວນ 55 ເຮັກຕາ, ຕອບສະໜອງຝູ່ນຄອກ ຈໍານວນ 111 ໂຕນ ເພື່ອປັບປຸງຄວາມອຸດົມສົມບູນຂອງດີນນາ, ໄດ້ມອບແນວພັນເຂົ້າ ຈໍານວນ 3,283 ກລ ໃຫ້ຊາວນາ ຈໍານວນ 68 ຄອບຄົວ ແລະ ມີແຜນຈະຕອບສະໜອງຝຸ່ນເຄມີ ຈໍານວນ 18.4 ໂຕນ ໃຫ້ຊາວນາທີ່ເຂົ້າຮ່ວມໂຄງການໃນຊຸດທີ1 ຂອງປີ 2023.
ເລີ່ມແຕ່ເດືອນ5 ປີ 2023 ຈະສືບຕໍ່ຈັດຕັ້ງປະຕິບັດກິດຈະກໍາຂອງໂຄງການ ຢູ່ບ້ານໝາກຮຽວ ມີແຜນຈະປັບນາ ຈໍານວນ 61 ເຮັກຕາ, ຕອບສະໜອງຝູ່ນຄອກຈໍານວນ 123 ໂຕນ ເພື່ອປັບປຸງຄວາມອຸດົມສົມບູນຂອງດິນນາ, ຈະມອບແນວພັນເຂົ້າຈໍານວນ 3,686 ກລ ແລະ ຝຸ່ນເຄມີຈໍານວນ 18,4 ໂຕນ ໃຫ້ຊາວນາຈໍານວນ 57 ຄອບຄົວ.
ສ່ວນບ້ານໝາກນາວເໜືອ ມີແຜນຈະປັບນາໃນເນື້ອທີ່ຈໍານວນ 28 ເຮັກຕາ, ຕອບສະໜອງຝູ່ນຄອກຈໍານວນ 57 ໂຕນ ເພື່ອປັບປຸງຄວາມອຸດົມສົມບູນຂອງດິນນາ, ຈະມອບແນວພັນເຂົ້າຈໍານວນ 1,709 ກລ ແລະ ຝຸ່ນເຄມີຈໍານວນ 8,5 ໂຕນ ໃຫ້ຊາວນາຈໍານວນ 37 ຄອບຄົວ.
ພາບ-ຂ່າວໂດຍ: ຈັນທະສອນ ມະນີວົງ
ສູນຂໍ້ມູນຂ່າວສານກະສິກຳ ແລະ ປ່າໄມ້
ກອງປະຊຸມປະເມີນຜົນການຄົ້ນຄວ້າປະຈຳປີ 2021 ພາຍໃຕ້ການຮ່ວມມືລະຫວ່າງ ສູນຄົ້ນຄວ້າກະສິກຳສາກົນເກົາຫຼີ (KOPIA) ແລະ ສະຖາບັນຄົ້ນຄວ້າ ກະສິກຳປ່າໄມ້, ແລະ ພັດທະນາຊົນນະບົດ (NAFRI)
:
ໃນຕອນບ່າຍຂອງວັນທີ 25 ພະຈິກ 2021, ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ, ໄດ້ຈັດກອງປະຊຸມປະເມີນຜົນການຄົ້ນຄວ້າ ພາຍໃຕ້ການຮ່ມມື ລະຫວ່າງ ສູນຄົ້ນຄວ້າ ກະສິກຳສາກົນ ແຫ່ງປະເທດ ສ.ເກົາຫຼີ (ໂຄເປຍ) ແລະ ສະຖາບັນຄົ້ນຄວ້າ ກະສິກຳ, ປ່າໄມ້ ແລະ ພັດທະນາຊົນນະບົດ, ປະຈຳປີ 2021.ໃຫ້ກຽດເປັນປະທານໂດຍ ທ່ານ ປອ ຈັນສະໝອນ ພົງອຸດົມ, ຮອງຫົວໜ້າ ສກປພ ແລະ ທ່ານ ຊິນ ຈາງໂຫ (Shin Chang Ho), ຜູ້ອຳນວຍການສູນ ໂຄເປຍ ປະຈຳ ສປປລາວ. ມີ ນັກຄົ້ນຄວ້າຈາກ ສກປພ, ຜູ້ຈັດຕັ້ງປະຕິບັດໂຄງການ, ພະນັກງານສູນ ໂຄເປຍ ປະະຈໍາລາວ, ແລະ ຄະນະຊີ້ນຳໂຄງການ ເຊິ່ງເປັນຄະນະກຳມະກອນປະເມີນເຂົ້າຮ່ວມທັງໝົດ 27 ທ່ານ (ຍິງ7ທ່ານ):.
ກອງປະຊຸມໄດ້ທຳການປະເມີນ ກິດຈະກຳ ແລະ ຜົນສຳເລັດ ຂອງ 5 ໂຄງການຄົ້ນຄວ້າ ໃນໄລຍະ 1 ປີຜ່ານມາ ພ້ອມທັງແຜນ ຕໍ່ໜ້າ ເຊິ່ງເນັ້ນໃສ່ ການສ້າງລາຍຮັບໃຊ້ຊາວກະສິກອນ ແລະ ພັດທະນາຊີວິດການເປັນຢູ່ຂອງປະຊາຊົນໃນເຂດຊົນນະບົດ. ບັນດາໂຄງການຄົ້ນຄວ້າດັ່ງກ່າວ ມີ 1) ການເພີ່່່່່ມລາຍຮັບໃຫ້ຊາວກະສິກອນຂະໜາດນ້ອຍໂດຍການນຳໃຊ້ແນວພັນ ແລະ ການນໍາໃຊ້ເຕັກນິກການປູກທີ່ເໝາະສົມໃນການປູກພືດຜັກລະດູຝົນ ຂອງປະເທດລາວ ; 2) ຄົ້ນຄວ້າການລ້ຽງໄກ່ພື້ນເມືອງເພື່ອເປັນສີນຄ້າ ໂດຍການປັບປຸງທາງດ້ານກຳມະພັນ; 3) ການພັດທະນາເຕັກໂນໂລຊີ ເພື່ອເພີ່ມຜົນຜະລິດ ແລະ ຄຸນນະພາບຂອງໝາກກ້ຽງ ຢູ່ເມືອງນ້ຳບາກ ແຂວງຫຼວງພະບາງ; 4) ຄົ້ນຄວ້າ ແລະ ນໍາໃຊ້ແນວພັນທົນທານຕໍ່ກັບການປ່ຽນແປງຂອງສະພາບແວດລ້ອມ ເພື່ອຄໍ້າປະກັນທາງດ້ານສະບຽງອາຫານ ແລະ ຜະລິດເປັນສິນຄ້າ; ແລະ 5) ຄົ້ນຄວ້າເຕັກນິກເພື່ອຍົກສະມັດຕະພາບຜົນຜະລິດຖົ່ວເຫຼືອງ ແລະ ການປຸງແຕ່ງໃນ ສປປ ລາວ
ທ່ານ ຊິນ ຈາງໂຫ, ຜູ້ອຳນວຍການສູນ ໂຄເປຍ ປະຈຳລາວ ໄດ້ກ່າວວ່າ: ການສະໜອງ ແນວພັນພືດຜັກຕ່າງໆທີ່ດີ ແລະ ການໂອນຖ່າຍເຕັກນິກການຜະລິດໃຫ້ຊາວກະສິກອນ ແມ່ນຈຸດປະສົງຫຼັກຂອງໂຄງການເຊີ່ງມັນບໍ່ພຽງແຕ່ການເພີ່ມສະມັດຕະພາບການຜະລິດ ແລະ ສ້າງລາຍຮັບໃຫ້ຊາວກະສິກອນ, ແຕ່ມັນຍັງປະກອບສ່ວນໃນການ ພັດທະນາຂະແໜງການ ກະສິກຳຂອງ ສ ປປລາວ.
ທ່ານ ປອ ຈັນສະໝອນ ພົງອຸດົມ, ຮອງຫົວ ສກປພ ໄດ້ໃຫ້ຄຳເຫັນວ່າ: ເຖິງຈະມີການແຜ່ລະບາດຂອງພະຍາດໂຄວິດ 19 ຢ່າງຕໍ່ເນື່ອງ ແລະ ສ້າງຄວາມຫຍຸ້ງຍາກໃນການຈັດຕັ້ງປະຕິບັດກິດຈະກຳຂອງໂຄງການ, ທັງ 5 ໂຄງການຄົ້ນຄວ້າ ໃນໄລຍະ 1 ປີຜ່ານມາກໍ່ຍັງສາມາດບັນລຸຕາມຈຸດປະສົງ ແລະ ແຜນກິດຈະກຳທີ່ວາງໄວ້ດີສົມຄວນ. ນອກຈາກນັ້ນ, ທ່ານ ປອ ຈັນສະໝອນ ພົງອຸດົມ ຍັງໄດ້ ແຈ້ງວ່າ, ຈະມີໂຄງການ “ສວນສາທິດການເພີ່ມສະມັດຕະພາບການຜະລິດໝາກກ້ຽງນໍ້າບາກ ເລີ່ມແຕ່ປີ 2022ເປັນຕົ້ນໄປ.
ສູນຄົ້ນຄວ້າກະສິກຳສາກົນເກົາຫຼີ (ໂຄເປຍ) ແມ່ນ ອົງກອນພາຍໃຕ້ໜ່ວຍງານບໍລິຫານການພັດທະນາຊົນນະບົດ ຂອງລັດຖະບານ ສ. ເກົາຫຼີ. ວິໄສທັດ ຂອງ ໂຄເປຍ ແມ່ນເພື່ອການພັດທະນາແບບຍືນຍົງ ພ້ອມທັງການຮ່ວມມືທີ່ດີຂອງລະຫວ່າງ ສ. ເກົາຫຼີ ແລະ ປະເທດຮ່ວມມື ທາງດ້ານ ເຕັກໂນໂລຊີ ກະສິກຳ. ສູນ ໂຄເປຍ ປະຈຳລາວ ສ້າງຂຶ້ນ ປີ 2016 ແລະ ມີຫ້ອງການຕັ້ງຢູ່ໃນ ສະຖາບັນຄົ້ນຄວ້າ ກະສິກໍາປ່າໄມ້, ແລະ ພັດທະນາຊົນນະບົດ.
ພິທີມອບ-ຮັບ ເຄື່ອງຈັກ ແລະ ອຸປະກອນໃນການຜະລິດກະສິກຳ ຈາກ ສ.ເກົາຫຼີ ໃຫ້ແກ່ ສູນຄົ້ນຄວ້າເຂົ້າ, ສະຖາບັນຄົ້ນຄວ້າກະສິກຳ,ປ່າໄມ້ ແລະ ພັດທະນາຊົນນະບົດ
ໃນຕອນເຊົ້າວັນທີ 29 ຕຸລາ 2021ທີ່ຜ່ານມາ ສູນຄົ້ນຄວ້າເຂົ້າ, ສະຖາບັນຄົ້ນຄວ້າກະສິກຳ,ປ່າໄມ້ ແລະ ພັດທະນາຊົນນະບົດ(ສກປພ)ຈັດ ພິທີມອບ-ຮັບ ເຄື່ອງກົນຈັກ ແລະ ອຸປະກອນໃນຜະລິດກະສິກໍາທີ່ໄດ້ຮັບການພັດທະນາຈາກ ສ.ເກົາຫລີ, ເຊິ່ງປະກອບມີລົດໄຖປັ່ນດິນທີ່ສາມາດໄຖ່ດິນໄດ້ເລິກ, ຝຸ່ນຊິລີເຄດ, ຝຸ່ນນ້ຳ, ແລະ ຢ່າປາບສັດຕູພືດ ມູນຄ່າຫຼາຍກວ່າ 50,000 ໂດລ່າ. ເປັນກຽດມອບໂດຍ ທ່ານ ຊິນ ຈາງໂຫ, ຜູ້ອຳນວຍການ ສູນໂຄເປຍປະຈຳ ສປປລາວ ແລະ ຮັບໂດຍ ທ່ານ ນາງ ປອ ໃຈ ບຸນພະນູໄຊ, ຫົວໜ້າສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ, ມີທ່ານ ຫົວໜ້າ ສູນຄົ້ນຄວ້າເຂົ້າ, ຫົວໜ້າ ພະແນກບໍລິຫານ, ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມທັງໝົດ 20 ທ່ານ.
ຜະລິດຕະພັນເຄື່ອງກົນຈັກດັ່ງກ່າວແມ່ນໄດ້ຮັບການພັດທະນາໃໝ່ ແລະ ເປັນມິດຕໍ່ສິ່ງແວດລ້ອມ ເຊິ່ງຈະຖືກໃຊ້ໃນໂຄງການຮ່ວມມືທີ່ກຳລັງຈັດຕັ້ງຢູ່ໃນ ສປປ ລາວ ເພື່ອເປັນການທົດສອບປະສິດທິພາບ ແລະ ຄຸນນະພາບ ຂອງເຄື່ອງດັ່ງກ່າວ ຮ່ວມກັບສູນທີກ່ຽວຂ້ອງ. ໂຄງການນີ້ເປັນການຮ່ວມມືລະຫວ່າງ ສູນຄົ້ນຄວ້າກະສິກຳ ສາກົນ ແຫ່ງ ປະເທດ ສ.ເກົາຫລີ ປະຈຳລາວ (KOPIA) ແລະ ສະຖາບັນຄົ້ນຄວ້າກະສິກຳ, ປ່າໄມ້ ແລະພັດທະນາຊົນນະບົດ (NAFRI) .
ທ່ານ ປອ ໃຈ ບຸນພານຸໄຊ, ຫົວໜ້າ ສກປພ, ໄດ້ກ່າວສະແດງຄວາມຂອບໃຈ ຕໍ່ການປະກອບສ່ວນດັ່ງກ່າວ ແລະ ໃນອະນາຄົດ ສກປພ ຈະສະໜອງບັນດາ ຜົນໄດ້ຮັບຈາການ ຜະລິດຕະພັນເຫຼົ່ານີ້ໃຫ້ກັບຊາວກະສິກອນ ໃນຫຼາຍໆຂົງເຂດໄດ້ທົດລອງນຳໃຊ້ເພື່ອຊ່ວຍການເພີ່ມສະມັດຕະພາບຜົນຜະລິດພືດຊະນິດຕ່າງໆທີ່ມີຄວາມປອດໄພໃນການຜະລິດ ແລະ ບໍລິໂພກ.
ທ່ານ ຊິນ ຈາງໂຫ, ຜູ້ອຳນວຍການ ສູນໂຄເປຍລາວ, ກໍ່ໄດ້ກ່າວວ່າ: ເຖິ່ງແມ່ນວ່າຜະລິດຕະພັນບັນດາເຄື່ອງກົນຈັກເຫຼົ່ານີ້ຈະມີຜົນດີກໍ່ຕາມ ແຕ່ ສປປລາວ ເຮົາຍັງບໍ່ເຄີຍນໍາໃຊ້ຝຸ່ນຊິລີເຄດ ສະນັ້ນທ່ານຈຶ່ງຄາດຫວັງວ່າມັນຈະສາມາດເປັນຜະລິດຕະພັນທີ່ດີອັນໜຶ່ງຊ່ວຍໃນການປູກເຂົ້າຢູ່ໃນ ສປປ ລາວ ແລະ ສາມາດຂະຫຍາຍໄປສູ່ອົງງກອນໃຫ້ແກ່ຊາວກະສິກອນນຳໃຊ້ໄດ້ຫຼາຍຂື້ນ.
ຂ່າວໂດຍ: ຈັນທະສອນ ມະນີວົງ ສູນຂໍ້ມູນຂ່າວສານກະສິກຳ ແລະ ປ່າໄມ້
