ພິທີເຊັນບົດບັນທຶກຄວາມຊົງຈໍາ ( MoU ) ແລະ ເປີດປ້າຍສາຂາມະຫາວິທະຍາໄລເຕັກນິກວິຊາຊີບກະສິກຳກວາງຊີ ສປ ຈີນ ກັບ ວິທະຍາໄລເຕັກນິກກະສິກຳ ດົງຄໍາຊ້າງ ສປປ ລາວ

Published 20/October/2022

ໃນຕອນເຊົ້າຂອງວັນທີ 18 ຕຸລາ ປີ 2022 ຢູ່ທີ່ສູນທົດລອງແນວພັນພືດທີ່ດີຮ່ວມມື ລາວ-ຈີນ ( ກວາງຊີ ) ໄດ້ຈັດພິທີເຊັນບົດບັນທຶກຄວາມຊົງຈໍາ ( MoU ) ແລະ ເປີດປ້າຍສາຂາມະຫາວິທະຍາໄລເຕັກນິກວິຊາຊີບກະສິກຳກວາງຊີ ສປ ຈີນ ກັບ ວິທະຍາໄລເຕັກນິກກະສິກຳ ດົງຄໍາຊ້າງ ສປປ ລາວ ທາງອອນລາຍຂື້ນ.

ຈຸດປະສົງ:

ເຊັນບົດບັນທຶກຄວາມຊົງຈໍາ (MoU ) ແລະ ເປີດປ້າຍສາຂາມະຫາວິທະຍາໄລເຕັກນິກວິຊາຊີບກະສິກຳກວາງຊີ ສປ ຈີນ ກັບ ວິທະຍາໄລເຕັກນິກກະສິກຳ ດົງຄໍາຊ້າງ ສປປ ລາວ
ເປີດປ້າຍສະຖານທີ່ຝຶກຫັດງານອາຊີວະສຶກສາ ສາຂາກະສິກໍາ ອາຊຽນ（ລາວ)-ຈີນ
ເປີດປ້າຍສະຖານທີ່ຈັດຊຸດຝຶກອົບຮົມການຮ່ວມມືລະຫວ່າງວິສາຫະກິດຢູ່ຕ່າງປະເທດ ກັບ ມະຫາວິທະຍາໄລເຕັກນິກວິຊາຊີບກະສິກໍາ ກວາງຊີ ສປ ຈີນ

ໃຫ້ກຽດເປັນປະທານພິທີຝ່າຍລາວ ໂດຍແມ່ນ ທ່ານ ປອ ນາງ ໄຈ ບຸນພະນຸໄຊ ຫົວໜ້າສະຖາບັນຄົ້ນຄ້ວາກະສິກຳ, ປ່າໄມ້ ແລະ ພັດທະນາຊົນນະບົດ, ຄະນະປະທານຮ່ວມ ມີ ທ່ານ ປອ ສາຍສະໝອນ ງາມສີ ຮອງຫົວໜ້າກົມອາຊີວະສຶກສາ ກະຊວງສຶກສາທິການ ແລະ ກິລາ, ທ່ານ ຈິດຕະກອນ ສີຊານົນ ອໍານວຍການວິທະຍາໄລເຕັກນິກກະສິກຳດົງຄໍາຊ້າງ. ນອກນັ້ນຍັງມີພະນັກງານແຕ່ລະພາກສ່ວນທີ່ກ່ຽວຂ້ອງເຂົ້າຮ່ວມ ຈໍານວນ 13 ທ່ານ ຄື: ມາຈາກພະແນກບໍລິຫານ ສກປພ 1 ທ່ານ, ມາຈາກກົມອາຊີວະສຶກສາ ກະຊວງສຶກສາທິການ ແລະ ກິລາ 1 ທ່ານດ ມາຈາກວິທະຍາໄລເຕັກນິກກະສິກໍາດົງຄໍາຊ້າງ 5 ທ່ານ, ມາຈາກບໍລິສັດແຊວນເຢ້ 1 ທ່ານ ແລະ ມີພະນັກງານສູນທົດລອງແນວພັນພືດທີ່ດີຮ່ວມມື ລາວ-ຈີນ 5 ທ່ານ.

ໃຫ້ກຽດເປັນປະທານພິທີຝ່າຍຈີນໂດຍແມ່ນ ທ່ານ ນາງ Li Xiang hong ອະທິການບໍດີມະຫາວິທະຍາໄລເຕັກນິກວິຊາຊີບກະສິກວາງຊີ ສປ ຈີນ, ທ່ານ Li Chunpeng ຮອງຫົວໜ້າພະແນກກະສິກໍາຊົນນະບົດ ແຂວງກວາງຊີ, ນອກນັ້ນຍັງມີ ຫົວໜ້າຫ້ອງການຮ່ວມມື-ພະແນກສຶກສາ ແລະ ກິລາ ແຂວງກວາງຊີ, ຫົວໜ້າສູນຄົ້ນຄ້ວາອາຊີວະ-ສະຖາບັນສຶກສາແຂວງກວາງຊີ ພ້ອມດ້ວຍພະນັກງານຄູອາຈານ ແລະ ວິຊາການທີ່ກ່ຽວຂ້ອງ ເຂົ້າຮ່ວມ ລວມທັງໝົດ 30 ທ່ານ, ພິເສດ ຍັງມີທ່ານ ຮອງຫົວໜ້າກົງສຸນໃຫຍ່ລາວປະຈໍານະຄອນໜານໜິງ ສປ ຈີນ ກໍໄດ້ໃຫ້ກຽດເຂົ້າຮ່ວມທາງອອນລາຍ.

ພາຍຫລັງສໍາເລັດທາງພິທີການແລ້ວ ທາງສູນກໍໄດ້ນໍາພາແຂກໄປຢ້ຽມຊົມ ແລະ ອະທິບາຍແຜນວາດການປູກພືດໃນແຕ່ລະໂຊນຂອງຂອງສູນ, ປະຫວັດຄວາມເປັນມາ ແລະ ການນໍາແຕ່ລະທ່ານທີ່ໃຫ້ກຽດມາຢ້ຽມຢາມ ແລະ ໃຫ້ທິດຊີ້ນໍາວຽກງານພາຍໃນສູນໃນແຕ່ລະຄັ້ງ. ນອກຈາກນັ້ນກໍໄດ້ນໍາພາແຂກລົງຢ້ຽມຢາມແປງທົດສອບຜົນຜະລິດ ແລະ ສຶກສາເຕັກນິກການປູກແນວພັນຖົ່ວເຫລືອງທີ່ນໍາເຂົ້າມາຈາກ ສປ ຈີນ ພາຍໃນສູນຕື່ມອີກ.