ລັດຖະບານ ສ ປ ປ ລາວ ກໍ່ໄດ້ມອບໜາຍໃຫ້ທາງ ກະຊວງກະສິກຳ ແລະ ປ່າໄມ້, ສະຖາບັນຄົ້ນຄວ້າກະສິກຳ ແລະ ປ່າໄມ້ ແຫ່ງຊາດ ດຳເນີນການຮ່ວມມືກັບອົງການ ສະຫະປະຊາຊາດເພື່ອການພັດທະນາ UNDP . ດັ່ງນັ້ນ, ໃນວັນທີ່ 8 ກໍລະກົດ 2011 ຈຶ່ໄດ້ຈັດກອງປະຊຸມ ໂຄງການປັບປຸງຄວາມອາດສາມາດໃນການປັບຕົວເຂົ້າສູ່ສະພາບເດີມດ້ານກະສິກຳຈາກຜົນກະທົບຂອງການປ່ຽນແປງດິນຟ້າອາກາດຢູ່ ສ ປ ປ ລາວ ( IRAS/NAPAFU project, ) ຂື້ນ ຢູ່ທີ່ໂຮງແຮມ ເສດຖາປາຣັດສ. ພາຍໃຕ້ການເປັນປະທານຮ່ວມໂດຍ ທ່ານ ສີສະຫວ່າງ ວົງຫາຈັກ ຮອງຫົວໜ້າສະຖາບັນ ຄົ້ນຄວ້າ ກະສິກຳ ແລະ ປ່າໄມ້ ແຫ່ງຊາດ ແລະ ທ່ານ Ms Kyoko Yokosuka ຮອງຜູ້ຕາງໜ້າ ອົງການສະຫະປະຊາຊາດ ປະຈຳ ສ ປ ປ ລາວ. ມີບັນດາຫົວໜ້າຫ້ອງການ, ກົມ, ກອງ, ສູນ ແລະ ອົງການຕ່າງ ທີ່ກ່ຽວຂ້ອງເຂົ້າຮ່ວມຈຳນວນກວ່າ 80 ທ່ານ.

ໃນຕອນເຊົ້າຂອງວັນທີ່ 11 ກໍລະກົດ 2011ຢູ່ທີ່ຫ້ອງປະຊຸມ ສູນຄົ້ນຄວ້າການນຳໃຊ້ທີ່ດິນ ສະຖາບັນຄົ້ນຄວ້າຄົ້ນຄວ້າ ກະສິກຳ ແລະ ປ່າໄມ້ ແຫ່ງຊາດ ໄດ້ຈັດກອງປະຊຸມ ພັດທະນາວຽກງານຂໍ້ມູນຂ່າວສານຂອງ ສຄກປ ເຊິ່ງຈັດຂຶ້ນໂດຍ ສູນຂໍ້ມູນຂ່າວສານ ແລະ ໃຫ້ກຽດເປັນປະທານກອງປະຊຸມໂດຍທ່ານ ສີສະຫວ່າງ ວົງຫາຈັກ ຮອງຫົວໜ້າສະຖາບັນຄົ້ນຄວ້າກະສິກຳ ແລະ ປ່າໄມ້ແຫ່ງຊາດ, ມີບັນດາຫົວໜ້າສູນ, ຄະນະສູນ ພ້ອມດ້ວຍວິຊາການຈາກສູນຕ່າງໆອອ້ມສະຖາບັນເຂົ້າຮ່ວມຈຳນວນກວ່າ 60 ທ່ານ. ຈຸດປະສົງຂອງກອງປະຊຸມຄັ້ງນີ້ແມ່ນເພື່ອປັບປຸງ, ແກ້ໄຂ ແລະ ພັດທະນາວຽກງານທາງດ້ານຂໍ້ມູນຂ່າວສານຂອງສະຖາບັນຄົ້ນຄວ້າກະສິກຳ ແລະ ປ່າໄມ້ໃຫ້ມີປະສິດທິຜົນຫຼາຍຂຶ້ນກວ່າເກົ່າພ້ອມກັນນັ້ນເພື່ອເຮັດໃຫ້ວຽກງານຂໍ້ມູນຂ່າວສານຂອງສະຖາບັນໃຫ້ໄດ້ມີການໄຫຼວຽນທົ່ວເຖິງ ແລະ ເຂົ້າເຖິງເປົ້າໜາຍຂອງບັນດາສູນຕ່າງໆອອ້ມຂ້າງ. ຢູ່ໃນກອງປະຊຸມບັນດານັກວິຊາການຍັງໄດ້ແບ່ງກຸ່ມກັນເພື່ອແກ້ໄຂບັນຫາຕ່າງໆຂອງການປະຕິບັດວຽກງານຂໍ້ມູນຂ່າວສານໃນນັ້ນໄດ້ແບ່ງອອກເປັນ 3 ກຸ່ມຄື: ກຸ່ມທີ່ 1 ແມ່ນວຽກງານ ຄຸ້ມຄອງຂໍ້ມູນຂ່າວສານ, ກຸ່ມທີ່ 2 ແມ່ນວຽກງານ ຜະລິດສື່ສິ່ງພິມຕ່າງໆຂອງ ສຄກປ ແລະ ກຸ່ມທີ່ 3 ແມ່ນວຽກງານຂໍ້ມູນຂ່າວສານ ແລະ ເທັກໂນໂລຍີ( ICT ). ຈາກນັ້ນທາງບັນດາຄະນະຜູ້ແທນກອງປະຊຸມຍັງໄດ້ຕົກລົງ ປຶກສາຫາລື ແລະ ພ້ອມກັນປະກອງຄຳຄິດຄຳເຫັນຕ່າງເພື່ອຈະແກ້ໄຂບັນຫາ ແລະ ຂໍ້ຄົງຄ້າງຕ່າງເຊັ່ນ: ບັນຫາການຜະລິດ ແລະ ເຜີຍແຜ່ສື່ສິ່ງພິມຕ່າງໆເປັນຕົ້ນແມ່ນ ການຜະລິດ ບົດຄົ້ນຄວ້າ, ບົດລາຍງານວິຊາການ, ວີດີໂອ, ແຜ່ນພັບ ແລະ ຮູບພາບອຶ່ນໆ, ບັນຫາທາງດ້ານການສົ່ງຂໍ້ມູນຂ່າວສານທາງດ້ານ ICT, ການນຳໃຊ້ອິນເຕີເນັດຂອງບັນດາສູນອອ້ມຂ້າງ ແລະ ບັນຫາການຈັດເກັບຮັກສາຂໍ້ມູນຕ່າງໆເພື່ອບໍ່ໃຫ້ສູນຫາຍ. ຈາກການດຳເນີນກອງປະຊຸມເປັນເວລາ 1 ວັນເຕັມໄດ້ເຫັນວ່າຫຼາຍພາກສ່ວນກໍ່ແມ່ນໄດ້ໃຫ້ຄວາມສົນໃຈ, ຈະພ້ອມກັນແກ້ໄຂ ແລະ ຈະໃຫ້ປະຕິບັດໃຊ້ໄດໃນຕໍ່ໜ້າຢ່າງສົມບູນ ເພາະວ່າວຽກງານເຜີຍແຜ່ຂໍ້ມູນຂ່າວສານເທັກໂນໂລຍີແມ່ນການເຜີຍແຜ່ ແລະ ສະແດງຜົນງານ, ຜົນສຳເລັດຂອງການຄົ້ນຄວ້າຕ່າງອອກສູ່ວົງກວ້າງ ແລະ ອອກສູ່ບັນດາປະຊາຊົນຜູ້ນຳໃຊ້ຢ່າງທົ່ວເຖິງ.

ໃນຕອນບ່າຍຂອງວັນທີ່ 27 ມິຖຸນາ 2011 ຢູ່ທີ່ ສະໂມສອນໃຫຍ່ຂອງ ສະຖາບັນຄົ້ນຄວ້າ ກະສິກຳ ແລະ ປ່າໄມ້ ແຫ່ງຊາດ ໄດ້ມີພິທີ ເຊັນສັນຍາຮັບເໜົາກໍ່ສ້າງສະໂມສອນຂອງ ສຄກປ ໄລຍະທີ່ສອງຂຶ້ນ. ໃນນີ້ໄດ້ແບ່ງໄລຍະການກໍ່ສ້າງອອກເປັນ 3 ຂັນຕອນຄື: ຂັ້ນຕອນທີ່ນຶ່ງ ແມ່ນວຽກ ກໍ່ສ້າງປະຕູ ແລະ ທາງເບຕົ່ງເສີມເຫຼັກເຂົ້າຫາໂຕອາຄານສະໂມສອນ. ເຊິ່ງມີມູນຄ່າໃນການກໍ່ສ້າງແມ່ນ 347,444,588 ກີບ, ຂັ້ນຕອນທີ່ສອງ ແມ່ນວຽກ ກໍ່ສ້າງຮ່ອງລະບາຍນ້ຳ ແລະ ທໍ່ລະບາຍນ້ຳແອ ອອກຈາກໂຕອາຄານ ເຊິ່ງມີມູນຄ່າໃນການກໍ່ສ້າງແມ່ນ 379,531,868 ກີບ, ຂັ້ນຕອນທີ່ສາມ ແມ່ນວຽກ ຕົບແຕ່ງ ແລະ ຕິດຕັ້ງພາຍໃນອາຄານສະໂມສອນ ເຊິ່ງມີມູນຄ່າໃນການກໍ່ສ້າງແມ່ນ 472,117,800 ກີບ ແລະ ໄດ້ມີ 3 ບໍລິສັດທີ່ຊະນະການປະມູນຄັ້ງນີ້ຄື: 1. ບໍລິສັດ ໄກສອນ ອອກແບບເຄຫາສະຖານ ຈຳກັດຜູ້ດຽວ, 2. ບໍລິສັດ ວິລະກໍ່ສ້າງ ເຄຫາ - ຂົວທາງ - ຊົນລະປະທານ ຈຳກັດຜູ້ດຽວ, 3. ບໍລິສັດ ບີລາວ ຈຳກັດ. ໃຫ້ກຽດເປັນປະທານ ໃນພິທີເຊັນສັນຍາຄັ້ງນີ້ຝ່າຍເຈົ້າຂອງໂຄງການ ກໍ່ຄືສະຖາບັນຄົ້ນຄວ້າ ກະສິກຳ ແລະ ປ່າໄມ້ແຫ່ງຊາດ ໂດຍແມ່ນທ່ານ ໄຊສົງຄາມ ພິມມະສອນ ຮອງຫົວໜ້າສະຖາບັນ ຄົ້ນຄວ້າ ກະສິກຳ ແລະ ປ່າໄມ້ແຫ່ງຊາດ ແລະ ຝ່າຍຜູ້ຮັບເໜົາ ໂດຍແມ່ນທາງປະທານຂອງບໍລິສັດຮັບຜູ້ເໜົາ 3 ທ່ານ ພ້ອມດວ້ຍຜູ້ຕາງໜ້າຈາກຫ້ອງການກະຊວງ, ກົມ, ກອງ ແລະ ພັກນັກງານອອ້ມຂ້າງສະຖາບັນເຂົ້າຮ່ວມ ຈຳນວນ 27 ກວ່າທ່ານ. ສ່ວນໃນການກໍ່ສ້າງ, ສ້ອມແປງຄັ້ງນີ້ກຳນົດການກໍ່ສ້າງແມ່ນຈະໃຫ້ສຳເລັດພາຍໃນ 60 ( 2 ເດືອນ ) ເຊິ່ງເລີ່ມຕົ້ນນັບແຕ່ມື້ລົງລາຍເຊັນເປັນຕົ້ນໄປ ແລະ ຜູ້ຮັບເໜົາຕົກລົງຈະເລີ່ມການກໍ່ສ້າງສ້ອມແປງພາຍໃນ 7 ວັນ ພາຍຫຼັງການເຊັນສັນຍາ. ຢູ່ໃນສັນຍາ ເຈົ້າຂອງໂຄງການກໍ່ຄື ສຄກປ ກໍ່ຍັງມີສິດຕິດຕາມກວດກາ ການປະຕິບັດສັນຍາຂອງຜູ້ຮັບໜົາ ແລະ ເອື້ອອຳນວຍຄວາມສະດວກຕ່າງໆ. ຕິດຕັ້ງຄະນະກວດກາເພື່ອກວດກາ ປະລິມານ ແລະ ຄຸນນະພາບຂອງການປະຕິບັດສັນຍາ.