ຕອນເຊົ້າຂອງວັນຄານ ​ທີ 10 ກໍລະກົດ 2012, ທີ່ໂຮງແຮມລາວພຼາຊາ ໂຄງການປັບຕົວດ້ານກະສິກໍາຕໍ່ສະພາບການປ່ຽນແປງດິນຟ້າອາກາດ  ໄດ້ຈັດກອງປະຊຸມຄະນະຊີ້ນໍາ ໂຄງການ ຄັ້ງທີ I ເພື່ອສະຫຼູບລາຍງານການຈັດຕັ້ງປະຕິບັດວຽກໃນ 06 ເດືອນ ທ້າຍປີ 2012 ໂດຍການໃຫ້ກຽດຂອງທ່ານ ດຣ. ຕີ ພົມມະສັກ ລັດຖະມົນຕີຊ່ວຍ ວ່າການກະຊວງກະສິກໍາ ແລະ ປ່າໄມ້ ແລະ ທ່ານນາງ ຄຽວໂກະ ໂຢໂກຊູກະ ຮອງຫົວໜ້າອົງການສະຫະປະຊາຊາດເພື່ອການພັດທະນາປະຈໍາ ສ ປ ປ ລາວ ພ້ອມທັງບັນດາທ່ານ ຄະນະຊີ້ນໍາໂຄງການເຂົ້າຮ່ວມຢ່າງພ້ອມພຽງ.
   ກອງປະຊຸມດັ່ງກ່າວນີ້ແມ່ນໄດ້ສະຫຼຸບການປະຕິບັດວຽກງານໃນໄລຍະ 01 ປີທີ່ຜ່ານມາ ເຊິ່ງເຫັນວ່າມີຫຼາຍວຽກງານທີ່ຜົນເດັ່ນຄື: ໄດ້ສຳເລັດການລາຍງານແຜນໄຕມາດ ॥ ທີ່ໄດ້ປະຕິບັດຜ່ານມາ ພ້ອມທັງໄດ້ເຮັດບົດລາຍງາຍພາກສະໝາມ ແລະ ບົດລາຍງານປະຈຳເດືອນ; ໄດ້ຢ້ຽມຢາມແລກປ່ຽນບົດຮຽນນຳພາກ ສ່ວນທີ່ກ່ຽວຂ້ອງ ໂດຍສະເພາະເມືອງ ແລະ ກຸ່ມບ້ານເປົ້າໝາຍຂອງໂຄງການ ແລະ ພ້ອມກັນນັ້ນໄດ້ລາຍງານບັນຫາຂໍ່ສະດວກ ແລະ ຂໍ້ຄົງຄ້າງ ທີ່ທາງໂຄງການຕ້ອງ ການແກ້ໄຂໃນຕໍ່ໜ້າ ແລະ ຈະສືບຕໍ່ປະຕິບັດແຜນງານໃນໄຕມາດ III 2012 ໂດຍການສືບຕໍ່ວາງແຜນຝຶກອົບຮົມ; ສ້າງຕັ້ງໜ່ວຍງານວິຊາການທ້ອງຖິ່ນ; ສຸມໃສ່ກິດຈະກຳຕ່າງໆ ທີ່ປະຕິບັດຢູ່ພາກສະໜາມເປັນຫຼັກຢູ່ໃນໄຕມາດ 3 ລວມກິດຈະກຳຂອງພາກຫ້ອງການຄຸ້ມຄອງໄພພິບັດແຫ່ງຊາດ ແລະ ກະຊວງຊັບພະຍາກອນທຳມະຊາດ ແລະ ສິ່ງແວັດລ້ອມທັງໝົດ (ການທົດລອງການປູກເຂົ້າຫຼາຍພັນ, ຜັກ, ຕົ້ນໄມ້ໃຫ້ໝາກ; ການແນະນຳລ້ຽງສັດນ້ຳ ແລະ ສັດບົກ) ແລະ ສືບຕໍ່ຂະຫຍາຍກິດຈະກຳຕ່າງໆ ໃນໄຕມາດໜ້າ; ຈັດກອງປະຊຸມກັບພາກສ່ວນທີກ່ຽວຂ້ອງ; ຮ່າງຂໍ້ຕົກລົງກັບບັນດາພາກສ່ວນທີ່ກ່ຽວຂ້ອງ; ປັບປຸງລະບົບການເງີນໃຫ້ມີຄວາມຄ່ອງແຄ້ວຄືນໃໝ່ສົກປີ 2012 ເພື່ອການໃຊ້ຈ່າຍຕົວຈິງ ແລະ ການຄາດຄະເນໃນຕໍ່ໜ້າ.

ເນື່ອງຈາກໂຄງການພັດທະນາ ວິສາຫະກິດ ກະສິກໍາ ຂະໜາດນ້ອຍໃນເຂດພູດອຍ (SADU) ຈະສິ້ນສຸດໃນ ເດືອນ ສິງຫາ 2012 ພາກສ່ວນທີ່ຈັດຕັ້ງປະຕິບັດໂຄງການ ໄດ້ຈັດກອງປະຊຸມລະດັບຊາດ ເພື່ອແລກປ່ຽນບົດຮຽນຂຶ້ນ ໂດຍໄດ້ຈັດຂຶ້ນ ໃນວັນທີ 5 – 6 ເດືອນ ກໍລະກົດ ທີ່ຜ່ານມາ ໃນນັ້ນມີຜູ້ເຂົ້າຮ່ວມຈາກອົງການ ແລະ ຫ້ອງການຕ່າງໆ ໃນລະດັບສາກົນ ລະດັບປະເທດ ຂັ້ນແຂວງ ແລະ ຂັ້ນເມືອງ ລວມທັງໝົດປະມານ 80 ທ່ານ.
ຈຸດປະສົງ ຂອງກອງປະຊຸມດັ່ງກ່າວ ແມ່ນການແລກປ່ຽນບົດຮຽນຈາກໂຄງການຂອງຊາດູທັງ 3 ໄລຍະ ທີ່ໄດ້ຈັດຕັ້ງປະຕິບັດໃນໄລຍະ 9 ປີ ຜ່ານມາ ແລະ ເພື່ອຮັບຟັງຄໍາຄິດຄໍາເຫັນ ເພື່ອການຊຸກຍູ້ ສົ່ງເສີມຊາວກະສິ ກອນໃຫ້ດີຂຶ້ນໃນອານາຄົດ.(ຂໍ້ມູນລະອຽດອ່ານເພີ້ມໃນຈົດໝາຍຂ່າວ ສະບັບທີ 133 ເດືອນ ກໍລະກົດ 2012)

ກອງປະຊຸມອາຊຽນ ກຸ່ມຊ່ຽວຊານ ດ້ານການພັດທະນາຜົນຜະລິດປ່າໄມ້ ແມ່ນຂະບວນການນຶ່ງຂອງການຮ່ວມມື ແລະ ແລກປ່ຽນບົດຮຽນດ້ານການຄົ້ນຄວ້າ ແລະ ພັດທະນາດ້ານປ່າໄມ້ ຊຶ່ງໃນນັ້ນມີທັງດ້ານເຕັກນິກ ແລະ ນິຕິກຳຕ່າງໆ ທີ່ກ່ຽວຂ້ອງກັບການນຳໃຊ້ ແລະ ຄວາມຍືນຍົງຂອງປ່າໄມ້ ໃນບັນດາປະເທດອາຊຽນ. ກອງປະຊຸມຄັ້ງນີ້ໄດ້ໄຂຂຶ້ນລະຫ່ວາງ ວັນທີ 25-26 ມິຖຸນາ 2012 ທີ່ນະຄອນຫຼວງຮ່າໂນຍ, ສສ ຫວຽດນາມ. ໂດຍການເປັນປະທານຮ່ວມລະຫວ່າງກຸ່ມຊ່ຽວຊານຕົວແທນຈາກກົມປ່າໄມ້ ແຫ່ງລາດຊະອານາຈັກໄທ, ແລະ ຕົວແທນຈາກ ສສ ວຽດນາມ.
ໃນກອງປະຊຸມ ເທື່ອນີ້, ຈາດ ສປປ ລາວ ໄດ້ມີ 3 ທ່ານ ເຂົ້າຮ່ວມ ເຊິ່ງແມ່ນຕາງໜ້າໃຫ້ກະຊວງກະສິກໍາ ແລະ ປ່າໄມ້ ຄື: ທ່ານ ສຸນທອນ ເກດພັນ, ຮອງຫົວສູນ ຄົ້ນຄວ້າປ່າໄມ້ ສະຖາບັນ ຄົ້ນຄວ້າ ກະສິກໍາ ແລະ ປ່າໄມ້ ແຫ່ງຊາດ, ທ່ານ ດຣ. ສີລາວັນ ສະຫວັດວົງ, ຫົວໜ້າກົມປ່າໄມ້ ແລະ ທ່ານ ບຸນສວນ ພົງພິຈິດ ຮອງຫົວໜ້າພະແນກແຜນການ ຂອງກົມປ່າໄມ້, ຫົວຂໍ້ໃນກອງປະຊຸມຄັ້ງນີ້ມີຄື:  (ລາຍລະອຽດອ່ານເພີ້ມຢູ່ຈົດໝາຍຂ່າວ ສະບັບທີ 133 ເດືອນ ກໍລະກົດ 2012)